‫الرئيسية‬ ثقافة فنون من وين حا نجيب تاني الأحباب؟
فنون - 7 مايو 2021

من وين حا نجيب تاني الأحباب؟

: من تاني
أغراب.
لا همس النجمة ييقن
لا ريحة جيتك تفتح
باب البيت تنساب.

ليلتين مرن وأنا محتار
ما اخترتك صاحب
لكنك كنت الأجمل
بين أحباب.

وكنت قصائد،
ورصه حدايق
وكنت مدائن من دون ناب.

وردة غنوة
لسه الغرفة
بين اللوحة
وشدة لوعة
و بين المعنى
والشباك
فاتحة كتاب.

كيفن غبت؟
كيفن رحت بين اللفتة
ودمعة لفة
عتبة البيت
راجياك بالضحكة
وأنا مستني
أصبحت سراب.

قمرة الصيف في المرفا
وأنا في جرحا
لاقتني النخلة
ياخ تتخيل مافي سلالم بالجنبة
ويا دي الوحلة
مافيش واحد يسلم
يديك النظرة محنة ل بكرة
أو حتى يدس في قلبك باقي عتاب.

ياداب
وفي دي اللحظة
طلعتَ اتدلى
كان الشارع لحن الحرب
رصاص بالجوف يتناوب
وجثث تتثاءب
مكان الخوف الهضبة بترمي ذئاب الوحشة
والحلوة بلدنا
مابية تعضي على عناب.
وبرضو كمان
مابية تحلق نغمة فكرة تجر العربة
نحلم
نمشي
نمشي
ومافي اياب.

طيب –
عليش كانت نزهة؟
وشنها طعم الفسحة؟
وليش؟ …..
ولي وين يا صاحب؟
وعلى ايه فوقنا
بيرحل هاذا سحاب؟

عليت الغيبة
خليت الباب
مفتوح على جمرة
بعد الهيبة
صفقا نازل يتحتَ
و لسة في النفس حتى من حتى
وطارت صاقعة
تطير العيشة
ضربت حفلة
خلت عقلي كثير مرتاب
ولازم دي الدنيا مجرد خدعة
أو أصل الدنيا ديا خراب.

ويا دم العين
من وين حا نموت الليلة؟
ولى وين حا نبكي؟ وبي وين حا نجيب من تاني صحاب ، من تاني الأحباب؟

ماهو رأيك في هذا المقال ؟

Average rating 0 / 5. Total : 0

كن أول من يقيم هذا المقال

تعليق واحد

  1. قصيدة شديدة شدة العاطفة السودانية المافي زيها
    المفردات من نوعية العب الممتنع

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *