بوخة المرقة

(مِدّك مكيول، والباقص مِدّنا)

(عِدك بي ألمي، بتورد عِدّنا)

نحنا الخلقنا بمدّنا

برفدنا دواعي عزيمتا

تلقانا زي ضكر النمل

في الحارة هيانا تميمتا

داكو المهدي وداك تورشين

القام عبّانا كونه خليفتا

عشميق معزز بالصبر

ديديك صابونتا، ديكا في ليفتا

مسنود مكحل بالأمانة

قلبا معقود بي حليفتا

مغروض منمر  مرمخانة

نصارى ترك ظلمونا

كم سور بي حديد كجرونا

حرمونا نجك ونصول

يغسل وجهتنا النور

سدورنا تلاقي سدور

ننفل حديد تلقانا

ما بدّنا غير الغول

ينجرا يزح يختانا

نحنا الخلقنا بمدّنا، قدر الرجا المأمول

 

فوق للملاحيظ خانة

نصارى ترك ظلمونا

تورشين نصروا الهجانة

المرقوا صباح الريد

صارين الروح في خيط

زادوا المفاهيم بيت

تشوا القريض جبخانة

كم دانة الروح ردموها

خرتوها بي حرقة خريت

عصروها وجابوا الزيد

حتوها قرض لولانا

زندية ولا همانا

شرشرنا فقرنا فضانا

كلامنا كتيرو رطانة

باحشين في أم در لمّانا

ناس بادية، ناس هجين

حضر مفلهمين، رشانا بالحنين

مرقنا مترفين، راجلين وناس سواري

شقيش عمرنا جاري

كلفتونا ديل كتير

خجونا بالتوالي، مركونا يا عيالي

مالكم انتو مالي

مالي في قليبي

مرتي جوه جيبي

جيبي كلاما قاسي

بجيد لعب الكراسي

بريدا ايوا بتطم

ست روحي وحواسي

بريدا وحيدي ضمه

بتلمسا وبشما

سرجا فوق شاسي

تاج راسي منصاصي

جاييك ركب راسي

والدنيا مهدية

عيال البلك نبطشية

سايقين الدنيا بطولية

ودمي الفضل شية

الخمسة × المية

يا اختي فانية، شالو التمرجية

شوية شان سٌخن، دسو القِراب رُكن

وعيال الحلة أفندية

عمال.. طلاب.. جرمندية

طاهرين كما الحسن

بلاقوا كيف كان

في أيما غصن، شكيك كتوف حضن

عوين هِن المدن

نيالا بكرتن، واقفه فوق قرن

نويره رأس علم

حلوتن مشم

فاطرا يوم بسم

ركب في خاتري نغم

ناديتا هادي بتطم

باكر مفارق الديم

بدلي فوق للغيم

بنزل بدوب في صلاة

علمينا ما معناه

نعصر نجيب الزيد

هل التسوي كريت، كل التسوي كريت

في جلدا يوم تلقاه، بوخة المرقة؟

لما الحبيبة تخون، تمرق من الخاطر

ملوص كذا الورقة، دقوس ومرمطون

مرقتو تهتدون، قبّلتو تفلحون

ذر الرماد عيون، مسكوا البلد دقون

اتجغموا الحليب، مسكتو في القرون

طاريكم إنقطع

توّا الدهب عرفناه، ما كلما لمع

ولقينا طيب القول، بوجه السمع

والقالوا في الطمع

سيداً يا خي بطال، إيداً فوقا غربال

ودار لما جمع، دمباري سيد محن

فكيف تحلمون لتحكموا الوطن؟

القومة للوطن، صغيرنا والكبير

شان وطن معلم ما وطن بديل

يوم عندنا أنخت، ما عندنا نشيل

نشيل نعبي فينا

كلنا التلينا، داكو توَّا جينا

جينا بالتقيل، حلفنا ننصروكا

غليد وسُلكان، عرديب صمغ لبان

أم بخيصة قندران، نعزو فلتكان

يصدك أم أضان، يسوى حندكوكا

في عرفك الحبيب، غوضت كم نظام

خليتنا للأفاعي، الذل والهوان !

قلت كم مقولة، قديتنا يا خي طولا

شق الصفوف قوال، ما ببقي ليك بطولة !

سمينا ما تسمي، قولنا جنقوجورة

أصيدة جوة كورة

عقدِكو اجتماعي، سميَّنا انتفاعي

عقدكو بندورة !

كشفا أيوا دورا، كشفنا دورو حرم

سوينا لينا معلم، تورشين غشانا سلم

تمتم وهزا رأسا، شاف البلد جنازة

دنقر ضرب نحاسا، شالتو الحماسة

وضب ضميرو شفناه

ريسنا ما كسفناه

قدمنا فوق دفعناه

القومة للوطن الهمبريبو ضقناه

جينا بعد غيبة، بعد ختاه أب دليبة

يا دابنا نمنا هواه

قمنا أرضا لله، زدنا حكمة الله

حلمنا طير أكلنا، لقانا مانا غلة

ترسنا جوه بره، ربيعنا لما طلة

كنا ناس ريادة

لمينا أرضا لله، نبتنا في القيادة

دلا فوقنا تورشين، قام فرح زيادة

حنكنا ختا خطين

لاوينا كنا اتنين

حاصرناه بي أمانة، جوكر ربط معانا

سدا ألف خانة

قال كلام تمام، كلو بي نظام

خيال مآته أختو، احذروا أب كلام

إيدينا للوطن، مدنية والسلام !

 

نيالا

عشرين عشرين ميلادية