أصلي ما تخيّلت
إنك تنزوي
والمشاوير تلغي روحا
وتتنسي
المكان في حد ذاتو
يبيت يباب
العمار في عقر دارنا
يصير خراب
والذئاب ياهِن… بشِمنّ
بلا وصي
الدمار طاح فينا راتب
لا بيحاسب لا بيعي
ضِقنا من عسف المُكالب
في غياب المفزعي
الشباب الأفنو عمراً
زاهي طرحو وألمعي
قالوا نحمي حمانا لازم
ذاك واجب وينبغي
شالو في جيدم سؤالم
ضاقو مر الموت جواب
والسؤال كان ياتو
بائس اجرى
في الناس العذاب
وياتو سكة رمتنا فيها
مزاعم الراعي الدَعي
الشباب الأفنو عمراً
زاهي طرحو وألمعي
يا حليلهم لسا نورم
فوق ليالينا مسرجي
ياعَمد هاوية وكسيرة
يا بلد ما عندي غيرا
يا سند والروح عضيرة
يا عضد لي في العسيرة
بئس مَن حَطَم الوطن
ال بحبو واصطفي
من نشأنا صغار
عيال ناساً أكارم
كنا نسمع كَلمة
تلقى عفارنا قايم
للمواجب
وفي المواسم
والتكاليف في سعي
نحنا أحفاد المعلم والتقي
خلقة فينا العزم نعلى ونرتقي
نطرق الآفاق أعفّا وفي عوز
تلقى فينا القاضي
ما تلقى الطغي
يا وطن
ليك شوقنا مترع
شوفنا كيفن كنا ننزع
من تعسكر لانتخاب
من خِيار الفردِ نبعِد
لخِيار الامة اكتر من قراب
وفي المزالق نبقى خوة
لا بنراجع لا بنهاب
فاللهيب ليه بقّا فينا
ريسين خرقو السفينة؟
ولا شفنا وشوفنا خاب؟
يا لهول الاحتراب
يا لهول الانقسام
وهول أن يأتيني قولا
يفتي فيك
وطني المحكر
في دمايا وينتقص
يتمنى ليك حال التشظي
ويستبيحك ويقتنص
و
كائناً ما كان
دبيب الفرقة
والردى في خطاي
يتسامى بي عطر
الرياحين المناقب
والمآثر سامقات
واللقاءات الأنيقة
والرجال أبان جلاليب
يقضو واجب
والمراعي الزاهية ديمة
والبيوت سمحة وحميمة
والنساء فُل الأماسي
وصاحبات وعر الطريق
والرفاق يتفادوا ليك خطر الحريق
يتسامى بينا
عشق ديار
فيها الموانس
والمشاكس والمراجع
والصديق
فكيفِن تلاقت،
واحترامي
يكضب الشين من كلامي،
لي شِن تلاقت فوقنا أهواء
المقادير المآسي
في حرب طالت ذميمة
وكيف حديث يجبرني
عنك انتفي
ومن وين؟
وكيف في الكون
يقوم أبداً سؤال
جوابه انك برا ذاتي
وايه يكون معنى الوجود
لو انتا …مافي!
يا حضرتك هل هنتَ لي
يا بسطتك هل كنتَ لي
يا متعتك هل دمتَ لي
وشجن الأماكن
والمسافات
المضمخة بالغنا
ومِسك المديح
فيك انت ذاتك
هل دا واقع كله كان
وهل صحي؟
ولا مالك يا بواشق
هابطة في
ليل الوساوس
تنهشيني
أزدريتك وين؟ ذريني!
وما لا اضغاث الاغاني
ضايعة في الايقاع عجولة
لما اخبارَك تجيني
يا بلد ما عرفت
ايه الدنيا
لولا الشفتو فيه
وأصلي ما تخيلت انك تنزوي
من بواكير المعارف
ونترة الصبا غير عابي
للهرج بين الحواري
وقدلة الناس في العصاري
لانبثاق شغف المعازف
بالنشيد تالد وطارف
لين لقينا الوعي وارف
والنضال عشم الدؤوب
إلاّ بانت للجميلة
ملامح الوعد الشقي
وعايزنّي
أنساك؟
كيف ذلك؟
والمتاع القدرو واسع
يا هو من بذلك وخيرك
فيك…انحنا، ما في غيرك
ولو نعدّد ما ح ننساها
الحماقات الودودة
والحمامات لو تحلّق
والمشاوير السعيدة
أين يذهب كل ذلك؟
أين
تسكن
الرومانسية
غير صهوات جيادك
واين نحكيها
الحكايات عن خلائق
والبسالات في مشانق
والملاذات من مهالك
ثم نهضات من براعم
فيها حاذق وكلو عازم
قبل ما يقع المباغت
لا شقيتك لا شقيتني
فينا مارق وفينا راغم
أين يذهب كل ذلك
والطريق للدهشة
أقصر من بكايا ومن جراحك ومن هزائم الليل
ومن بهمو العشي
وأصلي ما تخيلت انك تنزوي
والمواعيد تلغي روحا وتتنسي
يا بلد ما عندي غيرا
وخوفي انها
هسا ما في ولاني في.
*بانو دمعة، هي الدمع في اتساعه
