قصيدة: يا مشرف

محمد خير الخولاني

إلى (المشرف عبد الملك)

ما أدرانا طينّا إندكّه

غير ما هوانا باقي غُنانا

سال وإتلفّ

وأي غُنا نبداهو مُغلّف

كيف مِن موتنا نِجرب نحيا

أو نتصرف النفسك فوقو

إيه يا مُشرف والفي نِيتك؟

لازماً كان تِتصوَّف

في أُغِنيتك تَنقّي جِراحا..

لبِتين في وطنّا نلاقى الراحة،

نرتاح في الضُل ونوافي؟

والدايماً مافي أصلو جميل

وطن حدادي وجرحو طويل

يوماتي في ضِيق!

إيدو في سدرو

ونيلو طلِيق

بالألمي مُستف..

إيه في بالك

إيه يا مُشرف؟

ليه بِنغطي ضمير الغُنية

وليه نطّرف آخر الدِنيا

وطنّا الغالي نمشي نسيبو؟

وطن لا وين..

ما أطول زيقو..

وطن ما ساهل

وطن بي برِيقو وخطر بي وِلادو.

يلا نِزاحم في ختراتو

نلحق دمنّا في نقّاطو

قبل يتصرّف..

روق في عِلبك..

روق يا مُشرّف!

لو أصلو الزول الفيك بي ذاتو

الفي نِيتك طاوع هاتو ولينا اتفنن.

طالما حِسك فوقنا ممقّن

فوق حِسنا قائم تعال مِن طِينك نبقى توائم،

وأطول قامة..

شان روحنا تقرقِر فوق هِنداما

الأصلو مًغبِش وتملأ الساحة

لحدّي وطنّا يرِف بي جناحا

والزول الفينا يقُوم يتصرف..

تعال في بالي تعال نِتولّف

نقعُد فُرجة

فوق هِندامنا كزيما النار

حصل متَّعنا عيونّا مجال مرّقنا قرارنا

أو حتى في يوم إخترنا أقدارنا؟

أقدارنا في يوم ما اخترناها

لا الكِلمة التّهبش ولّعناها.

إيه نافعانا القعدة الكُربة

وإيه غاصِبنا نفُد في الغُربة هادي القعدة..

القعدة الإيه يا مُشرّف.

يا لحّاق القُدرة تخونك

وروحك واقْدة

ونِحنا نخونك لما نكونك نفساً باهتة

ولُبّها أضلم

الله دا يعلم

كم مرة سكتنا شان نِتكلّم أو نتظلّم دونما قوافي.

وليه يا مُشرف لما نموت بِنموت وقّافي؟

حقنا ضايع وحظنّا حافي

لافي خلا دونما مطِية

كفانا بلا وشرِّ بلية..

لو نفتح قبراً للحُرية قدُرنا مقاس

نختار الموتا نموتا

والروح تِتخارج مِن تابوتا

نمشي نفوّت

والطير فوق راسنا ينُوم ويِبيّض..

وجُرحنّا يابا أصلو يريِّط

يِختا العِيفة وطن مأساتو حدقتْ رِيفا ومُدنو عُموم

ياتو ظُلم في الدِنيا بِدوم

وهل في يوم الظلمِ خِلص؟!

أحسن لك ما تغيب فرّادي

جرّب تحيا موت يا مُشرّف

جرّب تحيا وضوق العِز

نيالا  أغسطس 1999م